നീയോ..ഞാനോ..

രണ്ടു മരങ്ങള്‍
വഴിവക്കില്‍
കൊമ്പു കോര്‍ത്തു
നീയോ ഞാനോ ..
താഴെ,
നിഴലുകള്‍ കെട്ടിപ്പുണര്‍ന്നു.
നീയോ ഞാനോ..

രാത്രി,
രണ്ടു കാളകള്‍
തൊഴുത്തില്‍ കൊമ്പു കോര്‍ത്തു.
നീയോ ഞാനോ..
പകല്‍
ഒരേ നുകത്തിന്‍ കീഴെ,
ഭാരം വലിച്ചു..
നീയോ..ഞാനോ.

ലെനിനും ചെഗുവേരയും

അടുക്കളയില്‍ നക്സലൈറ്റുകളുടെ ജാഥ?

ഉള്ളിയും ഇഞ്ചിയും അരിയപ്പെടുകയല്ല
പീരങ്കിയാല്‍ ആക്രമിക്കപ്പെടുകയാണ്.

ഒരാള്‍ക്കൂട്ടം അടുപ്പത്ത് തിളക്കുകയാണ്..

വര്‍ത്തമാന പത്രത്തില്‍ നിന്നും വാര്‍ത്തകളും പരസ്യങ്ങളും
തട്ടിമറിഞ്ഞു മുറിയാകെ ചിതറിക്കിടക്കുന്നു..

ഇന്നെന്താണ് എന്റെ വീട്ടില്‍
ലെനിനും ചെഗുവേരയും
ഗോഗ്വോ വിളിക്കുന്നത്‌...?

നല്ല തണുപ്പ്..
എനിക്കുറക്കം വരുന്നു..
ഞാന്‍ ഒന്നുകൂടി ഉറങ്ങട്ടെ..
ഇന്നത്തെ ദിനം കുറച്ചു കൂടി വൈകി തുടങ്ങിയാലെന്താ..?
പതിവുപോലെ കര്‍മ്മങ്ങളെല്ലാം നീട്ടിവെക്കാനുള്ളതല്ലേ...

തൊമ്മി

മരം കാറ്റിനോട് ചോദിച്ചു
പരിഭ്രമത്തിന്റെ ഇടറിയ ഈണവുമായി
നീ എവിടെനിന്ന് വരുന്നു?

രാത്രിയില്‍
വെളിച്ചമുള്ള വീട്ടില്‍ ഒളിഞ്ഞു നോക്കി.
ചെകുത്താന്‍
മാലാഖയുടെ അടിവസ്ത്രത്തിനിടയില്‍
ഭൂമിയിലെ ജനാപധിത്യം വായിക്കുകയായിരുന്നു

തിരിച്ചു വരുമ്പോള്‍
കണ്ടു
തൊമ്മി
അധോശബ്ദം പുറത്ത് വരാതിരിക്കാന്‍
അപാനത്ത്തില്‍
എഴുത്താണി തിരുകി
നഗ്നനായി കുനിഞ്ഞു നില്‍ക്കുന്നു,
സൌഭാഗ്യങ്ങള്‍ക്കു വേണ്ടി നീട്ടിയ കൈകളുമായി
എന്നിട്ടും ഒച്ച പുറത്തേക്കു പോയി

ജ്വലിച്ചു നിന്ന നക്ഷത്രങ്ങള്‍
ശടെന്നു കണ്ണുപൊത്തി

എന്നിട്ട്?
ഞാന്‍ ഓടി.

വഴിയില്‍
നിന്നെപ്പോലെ വിഷണ്ണനായി
നില്‍ക്കുന്ന ദൈവത്തെ കണ്ടു.
ദൈവം പറഞ്ഞു
ഭൂമിയില്‍ ജനാധിപത്യം നശിച്ചു എന്ന്.

മരമേ,
ഭൂമിയില്‍ അത് നശിച്ചിരിക്കുന്നു അല്ലെ?

വാ
തൊമ്മിയോടു ചോദിക്കാം.

ജിറാഫുകള്‍

കൌമാരേ ശാന്ത ഗംഭീരം
യൌവ്വനേ വശ്യ ഭയങ്കരം
സൈബരെ പ്രണയ സാഫല്യ
സംസ്കാരെ ജീര്‍ണ്ണ സുന്ദരം



ആരംഭ മൂര്ച്ചേ അന്ത്യം
ആസക്ത മോഹം സുരതം
ശിഷ്ടം സ്വപ്ന ദൈര്‍ഘ്യം
രോഗേ അശാന്ത നിര്‍ഭരം



ശീഘ്ര വാര്‍ധക്യ ഹേതു
അകാലെ പ്രജ്ഞ മൃത്യു



ശിഷ്ട ജീവിതം ശ്രേഷ്ടം

ന:കാമേ
ന: ക്രോധേ
ന: മോഹേ

പ്രാണ നിര്‍വ്വാണ അമ്നെഷ്യാത്മ മൃത്യു

ശോകമൂകം
ബന്ധുജനോ ജിറാഫുകള്‍...!

പ്രാവുകള്‍

മുയലുകള്‍ പ്രാവുകള്‍ക്ക് ഉപമയാകില്ല.
അവയ്ക്ക് പറക്കാനാകില്ല.

കാക്കകള്‍
പ്രാവുകള്‍ക്ക്
വിപരീത ഉപമയാകുന്നത്,
അവ കറുത്തതായതുകൊണ്ടാല്ല
തലചരിച്ചുള്ള കൌശല നോട്ടംകൊണ്ടാണ്.

കൊക്കില്‍ ഒലിവില കടിച്ചു പിടിച്ചു പറക്കുന്ന പ്രാവുകളെ
ഈയിടെ കാണാറേ ഇല്ല.

തൂവ്വല്‍ കുത്തില്‍ ചുരിക ഒളിപ്പിച്ച്
കൂടിനു വെളിയില്‍
കുറുകാതെ
പറക്കുന്ന
വെട്ടുകിളിയുടെ പ്രസരിപ്പുള്ള
ഒരു പ്രാവിനെ
ഞാനിന്ന് കണ്ടു.